Juõʹǩǩka vuõiggâdvuõđ
Juõʹǩǩka vuõiggâdvuõđivuiʹm juuʹrdet juõʹǩǩka vuõiggâdvuõđ leeʹd luâđast tõʹst huõlǩani, ǩii määdd vuäʹmast.
Juõʹǩǩka vuõiggâdvuõđ da mij jânnam puk mieʹcc da čäccõõzz ouʹdde samai šiõǥǥ vuäittmõõžžid liikkeed da virksmõõttâd luâđast. Luâđ âânnmõʹšše juõʹǩǩka vuõiggâdvuõđi soovšem raaji seʹst jeät taarbšuku mäddvuäʹmsteei lååʹv ij-ǥa vuõiggâdvuõđi ââʹnnmest taarbâž mäʹhssed ni mâid. Jeeʹres lääʹjj ouʹdde, ohjjee leʹbe rääʹjte juõʹǩǩka vuõiggâdvuõđid.
Vääʹld lokku, što juõʹǩǩka vuõiggâdvuõđ jie leäkku nåkmen viõǥǥâst pukin vuuʹdin, mâʹte meermieʹccin.
Juõʹǩǩka vuõiggâdvuõđin vuäǯǯak
Jååʹtted vääʹʒʒeeʹl, čuõiǥeeʹl da tanccâmkååʹlzin vuejeeʹl luâđast, mâʹte mieʹccin, luâttpoožnin da čäccõõzzin.
Racsted mieʹcc pååʹmhââʹttǩani.
Ååreed da insted kõskkpoddsânji vuuʹdin, koin liikkummuš lij še soovšum.
Uussâd luâttmuõʹrjid di noorrâd kuõbbrid da rääuhteteʹmes šââddaid.
Jååʹtted võnnsin, vuõjdõõttâd di jååʹtted jiõŋ mieʹldd.
Vuäggad da kaʹlddjest vuäggad.
Juõʹǩǩka vuõiggâdvuõđin jiõk vuäǯǯ
Piijjâd äävtool nuuʹbb oummu määddaid.
Heâmmeed dommrääuh ouddmiârkkân kuõrjtõõveeʹl čuuʹt ââlda jälstemsõõʹjid leʹbe ruõjeeʹl.
Kueʹđđed rooskid pirrõʹsse.
Viirted leʹbe pååʹmhâʹtted šõddi muõrid.
Vuejjad motorvuejjamneävvain mieʹccest.
Jååʹtted šelljmääddain, išttummšin leʹbe šâdduum peäldain.
Väʹldded koškkâm leʹbe viirrâm muõr.
Väʹldded seähttar leʹbe jeäkkal.
Heâmmeed leʹbe pååʹmhâʹtted looʹddi pieʹzzid leʹbe õõʹljid.
Heâmmeed jieʹllʼjid.
Häittad mäddvuäʹmsteei mäddâânnmõõžž.
Kueʹllšeeʹlled da mieʹcsted ääʹššmeâldlaž looʹvitää.
Peäʹstted pieʹnne aalmilaž vuõjdõõttâmriddu, päärnai siõrrâmpäiʹǩǩen vaʹrrjum voudda, tuejjuum laʹtte leʹbe sporttǩeâdda.
Ââʹnned pieʹnne lääʹbǯtää čõkkpääiʹǩest, sääurõõttâmpälggsest leʹbe nuuʹbb oummu vuuʹdest.
Ââʹnned pieʹnne luõvâs 1.3.–19.8. kõskksaž ääiʹj.
Juõʹǩǩka vuõiggâdvuõđ luâttsuõjjlemvuuʹdin
Suõjjlemvuuʹdin jååttmõõžž vueiʹtet rääʹjted luâttsuõjjlemlaaʹjjin, jõs vuuʹd jieʹllʼji leʹbe šââddai seeiltummuš ooudald tõn.
Suõjjlemvuuʹdin jååttmõõžž vueiʹtet rääʹjted luâttsuõjjlemlaaʹjjin, jõs vuuʹd jieʹllʼji leʹbe šââddai seeiltummuš ooudald tõn.
Kuõrjtõõvvmõõžž vueiʹtet rääʹjted leʹbe tõn vueiʹtet obbnes ǩieʹldded. Näkam rääʹjtõõzz käunnʼje vuuʹd vuâđđeemtuʹmmstõõǥǥ rääuhtem-meärrõõzzin leʹbe jäʹrjstõsvuâkkõõzzin. Jeeʹres luâttsuõjjlemvuʹvddtyypp järrne kuuitâǥ miâlggâd jiânnai nuuʹbbineez, ko veʹrddeet tõid.
Luontoon-kääzzkõõzzâst ouʹdde puhttum jååʹttempaaiʹǩi õhttvuõđâst mušttlet še päiʹǩǩmeâldlaž vuäʹppõõzzin da vuâkkõõzzin.
Šââddai da šâddvueʹzzi noorrmõš di tiiuʹri šeellmõš lie väʹlddvuâkkõõzz mieʹldd lååʹv-värrsaž tåimmʼmõš da lie soovšum tåʹlǩ tiõđlaž tuʹtǩǩummuž vääras.
Luâttsuõjjlemvuuʹdin ij vuäǯǯ väʹldded mäddaunnsid ni pååʹmhâʹtted mädd- leʹbe kaʹllivuâđ.
Vuäggmõõžž da kaʹlddjest vuäggmõõžž vueiʹtet rääʹjted måtam čäccõõzzin (jeäʹrbi mieʹldd jooʹttikueʹllčäccõõzzi kuõškk- da veʹrddvuuʹd).
Metallkaauʹni ooccmõš lij väʹlddvuâkkõõzz mieʹldd lååʹv-värrsaž tåimmʼmõš da lij soovšum tåʹlǩ tiõđlaž tuʹtǩǩummuž vääras. Meäʹcchalltõõzz vaaldšmem riikk määddain vuäǯǯ ââʹnned metalloocci juõʹǩǩka vuõiggâdvuõđin čuäʹjted, koʹst metallkääuʹn lie. Kuäivvjest âlgg kuuitâǥ leeʹd mäddvuäʹmsteei lååʹpp.
Vuâđđjurddi suõjjlemvuʹvddtyyppi mieʹldd
Meermieʹccin vuäǯǯ takainalla jååʹtted rääʹjtemvueʹzzid lokku vääʹldǩani
- Mieʹrǩǩuum ǩeäinai mieʹldd jååttmõš uuʹccad luâđ ânnʼjõõvvmõõžž da lij staanʼjab.
- Kuõrjtõõvvmõš lij soovšum tåʹlǩ tõn vääras čuäʹjtum sõõʹjin. Muõʹrji uussâm, kuõbbri noorrâm, vuäggmõš da kaʹlddjest vuäggmõš lie soovšum.
- Nåkam juõʹǩǩka vuõiggâdvuõđid kuulli jååʹttemnääʹl mâʹte racstem, talccâmkååʹlzin vuejjam da piânnairääidain vuejjam lie takainalla soovšum tåʹlǩ tõn vääras čuäʹjtum ǩeäinain.
Jieʹǧǧi suõjjlemvuuʹdin juõʹǩǩka vuõiggâdvuõđ jie takainalla leäkku rääʹjtum ni mäʹhtt. Tõin vuäǯǯ jååʹtted da kuõrjtõõvvâd, seämmanalla ko še kuõbbrid noorrâd, muõʹrjid uussâd di šââddaid noorrâd. Måtam jieʹǧǧi suõjjlemvuuʹdin lie kâʹl rääʹjtemvueʹzz, koin jååttmõš lij ǩiõlddum looʹddi pieʹzzraajjâmääiʹj.
Måtam uuʹccab suõjjlemvuuʹdin, ouddmiârkkân vuäʹmm mieʹcci da rååđai suõjjlemvuuʹd, lij kuõrjtõõvvmõš ǩiõlddum. Muđoi vuäǯǯ jååʹtted, seämmanalla ko še muõʹrjid uussâd da kuõbbrid noorrâd.
Čouggsummus vuâkkõõzzivuiʹm suõjjlum vuuʹdin, luâttmuõrrkarddsin da nuõʹrjisuõjjlemvuuʹdin, lij jååttmõš soovšum tåʹlǩ Meäʹcchalltõõzz looʹvin.
- Čårstõkkân lie tõk luâttmuõrrkarddâz, kooi čõõđ mâânn luâđastjååʹttemǩeäinn. Ǩeäinast ij vuäǯǯ moksted.
- Kevo luâttmuõrrkarddsest lij jeeʹres luâttmuõrrkarddsin čårsteeʹl vueiʹtlvaž kuõrjtõõvvâd čuäʹjtum sõõʹjin.