Suomujoen kolttakenttä

Suõmmjooǥǥ sääʹmǩeʹdd leäi Peäccam Suõʹnnʼjelsiid ååraž Semenooff piârri ǩieʹsspäiʹǩǩen iiʹjji 1946–1948. Peäccmest evakkooʹje jouddâm Suõʹnnʼjelsiid nuõrttsäʹmmlaid aazzteš loopplânji Čeʹvetjäurra.

Suõmmjooǥǥ sääʹmǩeeʹdd raajâlm

Kueʹtt
• Kuäʹđ raʹjješ e. 1946 vuõssmõs jälstemsââʹjjen. Tõʹst jälste Ooudaž, Nättli, Peeddar, Eeʹled, Mäʹrjj, Oʹnddri di Eʹllj.
• Ko põrtt valmštõõvi e. 1947, kuätta siirdčõʹtte Uʹcc-Evvan da Jååffaž päärneezvuiʹm. Ko sij siirdčõʹtte Vuâskjäurra, kueʹtt kuâđđji jälsteǩani ǩeʹttemkueʹtten.

Põrtt
• Põrtt leežž valmštõõvvâm e. 1947, da tõʹst jälste Ooudaž, Nättli, Peeddar, Eeʹled, Mäʹrjj, Oʹnddri di Eʹllj. Põrtt lij rajjum oʹđđest e. 1983. Raajjmõõžžâst jeät leäkku jääʹǩǩtam tärkka alggveärlaž raajjâmnääʹl tõn diõtt, ko vuäʹmm põrtt leäi kõččâm da čuuʹt läähhlõõvvâm.

Säuʹnn
• Säuʹnn lij še rajjum oʹđđest e. 1983 tõn diõtt, ko alggveärlaž säuʹnn leäi kõččâm da čuuʹt läähhlõõvvâm. Suõvvsääuʹnest taarbšum põõssâmčääʹʒʒ paakkeeš tuuʹl åuggan kruâitast. Reeddast leäi põččlõõččâmkruâitt, koon leʹjje piijjâm kooum ǩieʹđj ool.

Leäkk
• Leäkk lij rajjum Peäccam nuõrttsäʹmmlai takai maall mieʹldd. Puõccu ooʒʒõʹtte liâkku čuõškkääiʹj suõjju. Leäǥǥ ođsmõʹtteš e. 1980.

Njõlläiʹtt
• Njõlläiʹtt ij kuul sääʹmǩeâdda. Njõllääiʹt jueʹlǧǧ, 260 cm kokksaž čuõldd, lij leämmaž viirrâm juʹn 1940-lååǥǥast, ko Semenooff leʹjje puättam voudda. Sââʹjest kuâsttje veâl tärkka viârrum njõllǩiõtkâm da tõõzz luõsspieʹcciǩsaalvõõǥǥivuiʹm õhttuum njõllpeeʹllj.

Puäʒʒäidd
• Puäʒʒäidd lij nuʹtt 1400 mettar kokksaž jorbbäidd, koon vuʹvddšorradvuõtt lij nuʹtt 8 ha. Ääid õllâdvuõtt lij 150 cm. "Peässtõkkân" ääid čõõnnmest leät âânnam vääinäiggsaž saksslai teʹlfonkaaʹblid da naauʹlid. Ääid leät vueʹzzi teevvam 1980-lååǥǥast.

Jueʹlǧǧäiʹtt
• Ääiʹt leät raajjâm e. 1947 maddu kuåivvum pååđčuõldi ool, koid vieʹrreš šõlleen säʹppleei da meäʹccmuʹlddsäʹppleei tuâsttam diõtt.

Ǩiiuǥân
• Ǩiuggân lij muʹvrrjam Matti Sverloff miâlggâd obbnes oʹđđest e. 1980. Ǩiuggna kooll ǩeädggas njäʹlmmluŋkk da reäʹppenreäiʹj luŋkk. Ǩiuggnest paʹštteš leeiʹbid.

Sauʒʒpuʹvrr da -äidd
• Saauʒ leʹjje puõccui mâŋŋa nuõrttsäʹmmlai tääʹrǩmõs žeeʹvet. Saauʒ leʹjje ekka puuʹr seʹst. Peeiʹvi tõid õʹnneš poortemääidast leʹbe puäʒʒääidast, koozz tõid viʹǩǩeš võnnsin.
Suõmmjooǥǥ sääʹmǩeeʹdd aazztempirstõs

**Suõmmjooǥǥ sääʹmǩeeʹdd ǩeʹddmääʹrǩest käunnʼje täk põõrt da raajâlm: **

1. Kueʹtt
2. Põrtt
3. Jueʹlǧǧäiʹtt
4. Ǩiiuǥân
5. Säuʹnn
6. Ǩeâllar
7. Njõlläiʹtt
8. Pieʹnnepõõrtâž
9. Sauʒʒpuʹvrr
10. Sauʒʒäidd
11. Puäʒʒäidd da -ääidaž
12. Leäkk