Meccihaldâttâs Luándupalvâlusah lii kuáivum meddâl nyeskidum eennâmamnâs kuulmâ kollekuáivumist kevttum puáris maašin vyelni Lemmee aalmuglâšmeecist. Kuáivummašinijn lii kulgâm uccáá oljo mašinij vuálá eennâmvuáđun. Nyeskidum eennâm lii koivum meddâl mašinij vyelni ohtsis 22 seehâ tievâ, árvuštâllâm mield vááijuv 700 kiilud.
Meccihaldâttâs Luándupalvâlusah oomâst Lemmee Kollekiäinu piällást leijee kuáivummašinijd. Kollekuáivooh láá skeŋkkim mašinijd Meccihaldâttâsân čuosâttâhhâd, moh muštâleh kuávlust ovdeláá hárjuttum maašinlii kollekuáivumist.
“Taah kulmâ kuáivummaašin láá aalmuglâšmeecist muštootmin vandârdeijeid já iärásijd kuávlust jotteid kuávlu historjást. Vaidâlitteht lii kuittâg aiccum, et eennâmvuáđu mašinij vyelni lii nyeskidum, já mij lep almottâm ääšist Lope- já kocceemvirgádâhân. Mij lep riemmâm tivvoođ tile virgáduv ravvui miäldásávt, já tot, maid mij lep oppâm tábáhtusâst, šaddeh puátteevuođâst leđe iššeen Meccihaldâttâs tooimâin”, Meccihaldâttâs Luándupalvâlusâi eennâmkevttim sierânâsäššitobdee Laura Olsen-Ljetoff muštâl.
Nyeskidum eennâmaamnâs koivui meddâl Lemmee aalmuglâšmeecist roovvâdmáánu aalgâst. Meddâl kuáivum ääigi já tast maŋa kuáivummašinij vyelni já aldaaš juvvijn já čäciáldáin váldojii eennâmamnâs- já čäcičáittuseh laboratoriotutkâmušâi várás. Čáittusij vuáđuld oljo lii kulgâm eennâmvuáđun uccáá já tuše páihálávt mašinij vuálá.
“Čäcičáittusij puátusij vuáđuld oljo ij lamaš luhhoost peessâm levâniđ čáácán. Eennâmamnâsist valdum čáittusij vuáđuld mij lep luhostum väldiđ oovtâ kuáivummaašin vyelni nyeskidum eennâm meddâl, mut nube čuosâttuv kyevti kuáivummaašin vyelni valdum čáittuseh vala korŋuu räjiáárvui paajaabel. Täi kyevti maašin tááhust mij lep tiilám riskâárvuštâllâm, mon vuáđuld Lope- já kocceemvirgádâh meerrid tarbâšum jotkâtooimâin”, Olsen-Ljetoff muštâl.
Luándupalvâlusâi roovvâdmáánust nuurrâm nyeskidum eennâmaamnâs lii pieijum seehâi siisâ já syeijejum já siäiluduvvoo aalmuglâšmeecist, tassaaš ko sijvo peeleest taid puáhtá jođettiđ meddâl moottorkiälháiguin. Seehah jođettuvvojeh oljáás eennâmamnâs vuástáväldimsajan.
