Dálvit vilges dego muohta, geassit ruškesránes
Giron čiehkáda erenoamáš bures birrasii. Dálvit giron lea vilges dego muohta. Geassefárddas loddi lea seammá ivdnásaš go biras, ruškesránes. Gilonanoaivvi biras lea earenoamáš buorre báiki deaivat dán árktalaš šlája, go doallá čalmmiid rabas ja guldala dárkilit. Goas nu loddi gihča ja almmuha orrunsajis.
Giron lea veháš uhcit go fuolkeloddi rievssat. Eallinbiras goittotge muitala goappá šlájas lea sáhka; giron gihča ordarájá bajábealde, rievssat skeaiká ordarájá vulobealde. Dušše dalle, go njiŋŋálas giron lállá maniid, sáhttá varris giron seaivut ordarájá lahka. Doppe dat goittotge máhccá fas ruovttoluotta bearraša lusa maŋŋeleappos geassit go lea leamašan "áhčiidluomus" ordarájá lahka.
Girona latiinnagielat namma lea Lagopus muta. Lagopus čujuha sohkii ja dat oaivvilda njoammeljuolggi. Girona, ja maiddái rievssaha, juolggit leat ollásit uvjjaid vuolde. Dálvvi áigge sáhttá oaidnit dáin julggiin báhcán luottaid. Muta fas oaivvilda gielaheami, jienaheami. Dat ii girona dáfus doala áibbas deaivása, dasgo vánddardeaddji sáhttá gullat girona gihčamin. Geassit giron lea viehka jállu ja vánddardeaddji sáhttá oažžut das gova.
Jievjaskuolfi lea johtti
Gironbálgás muitalit maiddái bárbmolottiin, mat máhccet álo giđa áigge duoddarii besset. Muitalit maiddái ovtta johttis, jievjaskuolffis. Jievjaskuolfi ii gula šlájaide mat bessejit Urho Kekkonen álbmotmeahcis jeavddalaččat. Jievjaskuolfi, dego earátge skuolffit, leat johttit. Skuolffit ásaiduvvet besset dalle, go lea doarvái biebmu oažžumis.
Fuolatkeahttá máŋgga buorre muolddat- ja goddesáhpánjagis jievjaskuolfi ii leat ásaiduvvan besset Suoločielggi duottarguovllus. Okto lea váttis besset, jos ii gávnna guoimmi. Jos deaivá hui buorre tuvra, vánddardeaddji sáhttá oaidnit jievjaskuolffi seivvodeamen maiddái dán duottarguovllu bajábealde, muhto beasseáican livččii hui stuorra luondduođas! Goas nu jievjaskuolfi lea oidnon čohkohallamin Gilonanoaivvi vielttis. Datge lea stuorra ođas ja geasuha loddeberošteaddjiid. Stuorra, oppalašivnni dáfus vilges skuolffi oaidnin lea vajálduvakeahtes luondduvásáhus.
