Hiking destinations
Search for destination, route or locationThe search starts automatically when at least two characters are entered. Navigate to the search results using the up or down arrow keys.
Meahciráđđehusa bajásdoallan mohtorgielkámáđijaid hattiid bajidemiin viggojuvvo dávistit goasttádusdási loktaneapmái sihke bajásdoallat máđijaid meahcceráhkadusaid. Dál maid nuoraide 15-17-jahkásaččaide sáhttá háhkat máđidjalobiid, mat leat rávesolbmuid lobiid govttolaččabut. Meahciráđđehus bajásdoallá stáhta eatnamiin ja čáziin oktiibuot sulaid 2500 kilomehtera mohtorgielkálobiid Davvebađaeatnamis ja Sámis (Lappis).
Meahciráđđehus bajásdoallá stáhta eatnamiin mohtorgielkámáđijaid, maidda dat vuovdá máđidjalobiid. Ođđa máđidjalobiid hattit bohtet vuoibmái mánnodaga/vuossárgga guovvamánu 9. beaivve. Ovdal haddebajideami ostojuvvon lobit seilot vuoimmis.
Máđidjalobit oažžu golmma diimmu, jándora ja vahku bistevažžan sihke áigodatlohpin. Lobiid hattit leat golmma diibmui 17 euro (ovdal 10 euro), jándorii 29 euro (ovdal 17 euro), vahkkui 60 euro (35 euro) ja oba áigodahkii 100 euro (60 euro).
Haddebajidemiid vuođđun lea beaiváduvvon birasministeriija ásahus Meahciráđđehusa muhtin almmolaš hálddahusbargguid mearremávssuin. Ásahusa mielde almmosrievttálaš bargobálvalusain berrojuvvo máksu, mii dávista gaskamearálaččat bargobálvalusa buvttadeamis šaddan goluide. Ásahus boahtá vuoibmái guovvamánu 9. beaivve ja lea vuoimmis jagi 2027 loahpa rádjái.
Ovdal máđidjalobiiguin leat gokčojuvvon lohpevuovdima hálddahuslaš golut, dego vuovdinvuogádaga bajásdoallan, ja maŋemus guovtti jagi áigge daiguin leat maid fuolahuvvon máđijat. Ođđa ásahusa mielde boađut čuozihuvvojit ovdalačča eanet bajásdoallamii, dego meahcceráhkadusaide, oahpástagaide, šalddiide ja njáskamiidda.
Ovddit háve máđidjalobiid hattit leat dárkkistuvvon guokte jagi dás ovdal, nu ahte hattiid bajidemiiguin viggojuvvo maid dávistit oppalaš goasttádusdási loktaneapmái. Máđidjalobiin čoggon boađut adnojuvvojit duššefal máđijaid bajásdoallamii ja lohpevuovdima hálddahuslaš goluide.
”Ásahusa nuppástuvvama mielde bastit buoridit máđijaiguin johtima vejolašvuođaid. Dat buorida áššehasaideamet vuodjinmuosáhusa sihke máđijaid dorvvolašvuođa”, muitala bálvalusoamasteaddji Elina Odé Meahciráđđehusa Luonddubálvalusain.
Dálkkádatrievdama váikkuhusas muohta- ja jiekŋagokčasa mearri ja bistin sáhttet dovdomassii rievdat, mii gáibida mohtorgielkámáđijaid dárkkisteami ja dárbbu mielde sirdima dorvvolašvuođa sihkkarastima várás. Dálvet mohtorgielkámáđijaid merken jieŋa nala lea stuora bargu.
Nuoraide dehege 15–17-jahkásaččaide dárkkuhuvvon máđidjalobiid hattit leat govttolaččabut ja mákset sulaid beali rávesolbmuid lobiid hattiin. Nuoraid máđidjalobiid hattit leat golmma diimmus ovcci euro, jándoris 14 euro, vahkus 30 euro ja oba áigodagas 50 euro.
Nuoraidlobiid iežasgoastidanárvvu vuolit máksui lea sosiálalaš vuođđu. Haddemearridemiin viggojuvvo álkidahttit bearrašiid ovttas johtima luonddus sihke oahpásnuhttit nuoraid lundui ja luonddus johtimii.
Máđidjalobit ja eará meahccejohtalusa lobit stáhta eatnamiidda ja čáziide leat buotahkásaččaide nuvttá iežaset ruovttugieldda viidodagas. Meahccejohtaluslobit stáhta eatnamiidda sáhttá háhkat čujuhusas eraluvat.fi.
