Vánddardančuozáhagat
Oza čuozáhaga, johtolaga dahje sajádagaOhcan álgá automáhtalaččat, go unnimustá guokte mearkka leat čállojuvvon. Sirdás ohcanbohtosiidda njuolaiguin vulos dahje bajás.
Meahciráđđehusa Luonddubálvalusat lea váldán eret billahuvvan eananávdnasa golmma boares golleroggamis adnojuvvon mašiinna vuolde Leammi álbmotmeahcis. Goaivunmašiinnain leat golgan unna mearáš olju mašiinnaid vuollái eananvuđđui. Billahuvvan eanan lea goivojuvvon eret mašiinnaid vuolde oktiibuot 22 seahka, árvvu mielde vádjit 700 kilo.
Meahciráđđehusa Luonddubálvalusat eaiggáduššá goaivunmašiinnaid, mat leat Leammi Gollejohtolaga guoras. Golleroggit leat skeŋken mašiinnaid Meahciráđđehussii čuozáhahkan, mat muitalit viidodagas ovdal bargojuvvon mášengolleroggamis.
”Dát golbma goaivunmašiinna leat álbmotmeahcis muittuheame vánddardeddjiid ja earáid guovllus johttiid guovllu historjjás. Dađi bahábut mašiinnaid vuolde lea goitge fuobmájuvvon eananvuođu billahuvvan, ja mii leat sádden dieđáhusa áššis Lohpe- ja bearráigeahččodoaimmahahkii. Mii leat divvugoahtán dili doaimmahaga rávvagiid mielde, ja dáhpáhusas ožžojuvvon oahppu adnojuvvo ávkin Meahciráđđehusa doaimmas maid boahttevuođas”, Meahciráđđehusa Luonddubálvalusaid eanageavaheami spesiálaáššedovdi Laura Olsen-Ljetoff dadjá.
Billahuvvan eananávnnas váldojuvvui eret Leammi álbmotmeahcis golggotmánu álggus. Eret váldima áigge ja maŋŋel goaivunmašiinnaid vuolde ja lagas jogažiin ja čáhceáldáin váldojuvvoje eananávnnas ja čáhcečájánasat laboratoriadutkamušaid váste. Čájánasaid vuođul olju lea golgan eananvuđđui unna mearážiid mielde ja dušše báikkálaččat mašiinnaid vuollái.
”Čáhcečájánasaid bohtosiid vuođul olju ii lean lihkus beassan leavvat čáhcái. Eananávdnasis váldojuvvon čájánasaid vuođul ovtta goaivunmašiinna vuolde billahuvvan eanan sáhtii váldojuvvot eret, muhto guovtti goaivunmašiinna vuolde, mat ledje nuppi čuozáhagas, váldojuvvon čájánasain rádjeárvvut manne vel badjel. Dán guovtti mašiinna oasil mii leat diŋgon riskaárvvoštallama, man vuođul Lohpe- ja bearráigeahččodoaimmahat mearrida dárbbatlaš joatkkadoaimmain”, Olsen-Ljetoff muitala.
Luonddubálvalusaid golggotmánus čoaggan billahuvvan eananávnnas lea biddjon seahkaid sisa ja suddjejuvvon ja seailluhuvvo álbmotmeahcis, dassážii go siivodilit diktet daid fievrrideami eret meahcis mohtorgielkkáiguin. Seahkat fievrriduvvojit oljonaga eananávdnasa vuostáiváldinbáikái.
