Juáhháá vuoigâdvuođah
Juáhháá vuoigâdvuođah uáivildeh puoh ulmui vuoigâdvuođâ leđe luándust tast sorjohánnáá, et kii oomâst ton kuávlu enâmijd.
Juáhháá vuoigâdvuođah já mii enâmij valjaas meecih já čácáduvah fäälih eromâš šiev máhđulâšvuođâid jotteeđ já virkosmuđ luándust. Nuuvtpa luándu kevttimân juáhháá vuoigâdvuođâi suovvâm raajij siste ij taarbâš eennâmomâsteijee love ige vuoigâdvuođâi kevttimist taarbâš mäksiđ maiden. Jieškote-uv laavah adeleh, stivrejeh tâi räijejeh juáhháá vuoigâdvuođâid.
Vääldi huámášumán, et juáhháá vuoigâdvuođah iä lah tagarin vyeimist puoh kuávluin, tego aalmuglâšmeecijn.
Juáhháá vuoigâdvuođáin tun uážuh
Jotteeđ vääzin, čuoigân já pyeráin luándust, tego meecist, luánduniijtost já čácáduvâin.
Raccastiđ vahâgithánnáá enâduv.
Orroođ já ijjâdiđ koskâpuddâsávt kuávluin, main jotteem-uv lii loválâš.
Čuággiđ luándumuorjijd, kuobbârijd já rávhudithánnáá šaddoid.
Jotteeđ kárbáin, vuoijâđ já jotteeđ jieŋâ alne.
Uágguđ (meiddei runneest).
Juáhháá vuoigâdvuođáin tun jieh uážu
Cokkiittiđ ávustuulâ nube enâmáid.
Hettiđ päikkiráávhu ovdâmerkkân leirâdâtmáin liijkás alda aassâmtááluid tâi ruojâmáin.
Luonniđ pirrâs.
Njeidiđ tâi vahâgittiđ šaddee muorâid.
Vyeijiđ moottorvuájánáin enâduvâst.
Jotteeđ šiljoenâmijn, ištâdmijn tâi viljâlmist leijee piälduin.
Väldiđ kuškâm tâi viirrâm muorâid.
Väldiđ siähtálijd tâi jáhálijd.
Hettiđ tâi vahâgittiđ luudij piervâlijd tâi uđâgáid.
Hettiđ elleid.
Hemâdiđ eennâmomâsteijee eennâmkevttim.
Kuálástiđ já miäcástiđ ääšimiäldásij luvijttáá.
Lyeštiđ pennuu almolii vuoijâmriidon, párnái sierâdemsaijeen väridum vijđodâhân, aitârdum saaveehlättei tâi valastâllâmkiädán.
Toollâđ pennuu luovâsin čuákkipäikkikuávlust, sávrudâttâmpálgást tâi nube ulmuu vijđoduvâst.
Toollâđ pennuu luovâsin 1.3.–19.8. koskâsii ääigi.
Juáhháá vuoigâdvuođah luándusuojâlemkuávluin
Suojâlemkuávluin jotteem puáhtá raijiđ luándusuojâlemlavváin, jis kuávlu ellee- tâi šaddonääli siäiludem váátá tom.
Suojâlemkuávluin jotteem puáhtá raijiđ luándusuojâlemlavváin, jis kuávlu ellee- tâi šaddonääli siäiludem váátá tom.
Leirâdâttâm puáhtá raijiđ tâi tom puáhtá ollásávt kieldiđ. Tágáreh raijiittâsah kávnojeh kuávlu vuáđudemmiärádâs rávhudittemmiärádâsâin tâi oornignjuolgâdusâin. Jieškote-uv luándusuojâlemkuávlutiijpah spiehâsteh kuittâg uáli ennuv nubijnis taan ääši kuáttá.
Luontoon-palvâlusâst oovdânpuohtum vandârdemčuosâttuvâi ohtâvuođâst láá muštâlum meid čuosâttâhkuáhtásijn ravvuin já njuolgâdusâin.
Šadoi já šaddo-oosij nuurrâm sehe tiivrij pivdem lii váldunjuolgâduslávt love vuálásâš toimâ já loválâš tuše tieđâlii tutkâm várás.
Luándusuojâlemkuávluin ij uážu väldiđ eennâmamnâs ige vahâgittiđ eennâm- tâi källeevuáđu.
Uággum já runneuággum puáhtá raijiđ mainnii čácáduvâin (iärásij lasseen vajâldemkyeličácáduvâi kuoškâ- já virdekuávluh).
Meetaaltiiŋgâi uuccâm lii váldunjuolgâduslávt love vuálásâš toimâ já loválâš tuše tieđâlii tutkâm várás. Meccihaldâttâs haldâšem staatâ enâmijn uážžu kevttiđ meetaaluuccâmpiergâs juáhháá vuoigâdvuođáin čujottiđ meetaaltiiŋgâi sajaduvâid. Kuáivost kalga kuittâg leđe eennâmomâsteijee lope.
Vuáđujurduuh suojâlemkuávlutiijpâi mield
Aalmuglâšmeecist uážžu táválávt jotteeđ rijjâ eereeb raijiittâsoosijn.
- Merkkejum pálgái mield jotteem keeppid luándu kuullâm já lii torvolub.
- Leirâdâttâm lii loválâš tuše uulmán čujottum soojijn. Muorjij já kuobbârij čuággim, uággum já runneuággum láá lováliih.
- Tagareh juáhháá vuoigâdvuođáid kullee jotteemhäämih tego raccastem, pyeráin vyeijim já penuvráiđoin vyeijim lii táválávt loválâš tuše ton uulmán čujottum pálgáin.
Jeegijsuojâlemkuávluin juáhháá vuoigâdvuođah iä táválávt lah räijejum monnân naalijn. Jotteem já leirâdâttâm lii rijjâ, siämmáánáál kuobbârij já muorjij čuággim já šadoi nuurrâm. Mainnii jeegijsuojâlemkuávluin láá kale raijiittâsuásih, main jotteem lii kieldum luudij pessimääigi.
Mainnii ucceeb suojâlemkuávluin, ovdâmerkkân puáris vuovdij já rođoi suojâlemkuávluin, leirâdâttâm lii kieldum. Mudoi jotteem lii rijjâ, siämmáánáál muorjij já kuobbârij čuággim.
Čovgâdumosávt suojâlum kuávluin, luándumeecijn já nuárjuisuojâlemkuávluin, jotteem lii loválâš tuše Meccihaldâttâs luuvijn.
- Spiehâstâhhân láá toh luándumeecih, moi čoođâ jotá vandârdempäälgis. Pálgást ij uážu spiehâstiđ tuárispel.
- Kiävu luándumeecist lii nubenáál ko eres luándumeecijn máhđulâš leirâdâttâđ čujottum soojijn.