Šlájaid valljivuohta Geavus
Bávttiin leat earenoamáš šaddanbiras. Bávttit leat dálvit measta muohttaga haga, beaivváš ligge daid johtilit, golgi čázit ja lottiid baikkat duktejit daid. Duoddariid dávjá easkka maŋŋit geassit suddi muohtasajiin ja šattolaš golkaguolbaniin gávdnojit maiddái áibbas earenoamáš šaddošlájat.
Áitatvuloš šlájaid ja hárvenaš luonddu oasa
Geavu ávžžis leat eanet ealli- ja šaddošlájat go birrasa duottaralážis. Geavvu leage okta deháleamos guovlluin gos vuhttojit máŋggat hárvenaš davvi šlájat.
Ávžžis šaddet earenoamáš valjis áitatvuloš šaddošlájat, maidda Geavoroggi lea okta hárvenaš šaddanbáikkiin Suomas. Bávttiin ja vulobeale juovahagain loktet earet eará hádjagáiski, báktesmiera, duottararnihkka ja biikasiepman. Geavvu lea maiddái riikamet davimus báiki gos gávdno jeaggenarti. Geavus lea áidna báiki Suomas gos gávdnojit ruostamáttasámil-, ávžecuipe- ja boršebáktesámil.
Geavvu lea dehálaš máŋgga loddešládjii, ja doppe sáhttet gávdnot juoba stuorra oassi daid bessedeaddji máddodagas min riikkas. Ávžžis bessejit máŋggat boralottit, dego boaimmážat ja cizášfállit. Goalssit ja čoađggit leat dábálaš čáhcelottit Ávžžis.
Maiddái guoikgáhrit loaktá Geavu rávdnječáziin. Jávrriin ja jávrrážiin loktet earet eará haŋŋát, njurgot ja skoarat. Jeakkit leat dehálaččat davvi šlájaide, dego ruksesguškilii, suotnjolirážii, čáhppesčoavjevirožii ja bávgožii.
Geavu beahcevuvddiin dábálaš lottit leat vintán ja leaibeloddi, ja sáhttá doppe deaivat maiddái gaccepačča dehe bihcebásgáski. Johkaleagi šattolamos vuvddiin ellet mátta šlájatge, dego vuovdevizar dehe ruovdecizáš.
Go gakcu duoddarii sáhttá oaidnit girona, állaha, láfola ja vuolleleappos marastagas vuostái sáhttet boahtit ovdamearkka dihtii bupmolcizážat, rievssahat dahje giellavealggut. Okta earenoamáš ášši Geavus lea čierggesrásttis, mii lea min davimus rásttis.
Geavus ellet maiddái geatki, čeavrris, albbas ja guovža. Lihkolaš lea son, gii oainnesta hui áitatvuloš njála. Geavus sáhttá buorre lihkuin oaidnit luosa.
Geavonjálmmi niitu
Geavonjálmmi niitu gullá oassái Geavu luonddumeahccái, ja Meahciráđđehus dikšu dan láddjemin. Eará oassi niittus lea priváhta oamastusas Turku universitehta Lappi dutkanlágádus Geavus lea dahkan guovllus šattolašvuođačuovvumiid.
Oasis luonddumeahcci niittu leat valjis šlájat, eanaš goikkis, muhto báikkuid maiddái varas suoidneniitu. Niittus šaddet šlájat mat leat klassifiserejuvvon dollojuvvojit geahču vuolde. Dat šlájat leat nuortasiemanásti (ráfáiduhtton), sihke márjjá- ja čievračoavdda. Fuomášan veara šlájat leat lassin duottarsáhpal, gieddedáđir, alitbiellorássi, ránesgaccot, sámeguoita, jeaggečalbmi, giđđasuorbmalasta, davveruhtarássi, boallorássi ja gáddevitku. Niittus sáhttá gávdnat maiddái niitoháisuoinni.
